Ljósmynd af virginalnum eins og hann leit út í byrjun maí 2013

Ítalska sembalsmiðnum Tony Chinnery miðar vel við smíði virginalsins sem Barokksmiðjan pantaði hjá honum á síðasta ári. Nú stefnir allt í að hljóðfærið verði tilbúið fyrir Barokkhátíð á Hólum í lok júní. Vígsla hljóðfærisins er á dagskrá fyrsta dags hátíðarinnar og leikur sænski semballeikarinn Lars Sjöstedt á hljóðfærið en með honum leikur á tónleikunum kona hans, Maria Sjöstedt, sem er fiðluleikari. Hljóðfærið nýja er mikill fengur fyrir starf Barokksmiðjunnar.

Sérstaklega ber að þakka Menningarráði Norðurlands vestra og Menningarráði Eyþings fyrir myndarlega stofnstyrki til þessa verkefnis. Sömuleiðis Arngrími Jóhannssyni tónlistarunnanda og flugmanni.

Jón Þorsteinsson við kennslu í Hólaskóla í júní 2012

Í ráði er að Jón Þorsteinsson, söngvari og söngkennari í Amsterdam, haldi söngnámskeið á Barokkhátíð á Hólum í sumar með svipuðu sniði og hann gerði á liðnu sumri. Námskeiðið gerði mikla lukku, bæði hjá nemendum Jóns en líka hjá öðrum þátttakendum í hátíðinni og gestum sem heyrðu sönginn út á hlað Hólaskóla. Barokksmiðjan niðurgreiðir námskeiðið en vegna kostnaðar verða nemendur nú að greiða svolítið gjald fyrir kennsluna, líklega 10.000 til 15.000 krónur. Það er þó ódýrt miðað við hversu mikið nemendur fá fyrir sinn snúð á námskeiðinu, fyrir utan allt annað sem njóta má á Barokkhátíð á Hólum. Áhugasamt söngfólk getur haft samband við Jón beint til að fá upplýsingar. Netfang hans er jon.thorsteinsson0@gmail.com. Skráning fer svo fram á netfangið barokksmidjan@holar.is.

Barokksmiðja er bragabót
sem bætir glóð í lífið.
Þar verður gleði! ei hætishót
hljómar leiða kífið.

Þar virginalið lífsins ljóð,
leikur á hjartans strengi,
þar bregður ljósi á barrokslóð
þar brosa fjöll og engi.

Þar sporin tekur sprund við hal,
þar spretta fögur blómin.
Við músu gyðju tekið tal
þar tindrar sumarljóminn.

Í hátíðarmessunni á sunnudagsmorgun messaði séra Hjörtur Pálsson, hljómsveitin lék og þau Aðalheiður Ólafsdóttir og Pétur Oddbergur Heimisson sungu dúett. Jón Þorsteinsson söng líka tvo sálma undir útdeilingu og Eyþór Ingi Jónsson var organisti.

Barokkhátíð á Hólum 2012 tókst í alla staði mjög vel og þátttakendur fóru afskaplega ánægðir heim á leið. Fimmta barokkhátíðin á Hólum verður haldin 27.-30. júní 2013, að sjálfsögðu enn glæsilegri en í ár.

Petri Arvo í Auðunarstofu

Petri Arvo, blokkflautuleikari frá Finnlandi kynnti sögu blokkflautunnar í afar fróðlegu erindi með tóndæmum og svo lék blokkflautukvartett hans, Q Consort á stórkostlegum tónleikum í Hóladómkirkju. Myndband frá tónleikunum verður vonandi sett hér á vefinn mjög fljótlega. Jón Þorsteinsson hélt áfram að kenna söngnemum sínum og tónar þeirra bárust um hlaðið á Hólum. Sömuleiðis kenndi Ingibjörg Björnsdóttir barokkdansana sem voru dansaðir í kvöld á Barokkballi í Hólaskóla.

Þá var snæddur hátíðarkvöldverður og voru Lára Sóley Jóhannsdóttir og Hjalti Jónsson veislustjórar. Söngnemar Jóns Þorsteinssonar létu ljós sitt skína, systkinin Kristín og Ástbjörn Haraldsbörn sýndu barokkdansa íklædd ekta barokkfötum úr eigu Þjóðleikhússins. Búningarnir eru frá sjötta áratug síðustu aldar, eftirmyndir fatnaðar frá barokktímanum við sænsku hirðina.

Jaap Schröder

Einn af frumkvöðlum barokkhreyfingarinnar í Evrópu á síðari hluta tuttugustu aldar, hollenski fiðluleikarinn Jaap Schröder, tekur þátt í Barokkhátíð á Hólum og hélt tónleika í Hóladómkirkju í gær, föstudag, ásamt Hildigunni Halldórsdóttur fiðluleikara og Sigurði Halldórssyni sellóleikara. Einnig kom hljómsveit hátíðarinnar fram á tónleikunum og þar gafst ungum hljóðfæraleikurum sem sóttu námskeið Barokksmiðjunnar á Akureyri einstakt tækifæri til að leika með þessum aldna meistara sem nú er á 87. aldursári en í fullu fjöri.

Hildigunnur Halldórsdóttir, leiðari hljómsveitarinnar

Jón Þorsteinsson

Að minnsta kosti tíu söngnemendur verða á söngnámskeiði Jóns Þorsteinssonar á Barokkhátíð á Hólum 2012. Söngurinn verður áberandi í dagskrá hátíðarinnar og söngnemum gefst kostur á að koma fram á söngvökunni á föstudagskvöld, hátíðarkvöldverðinum á laugardagskvöld, í messunni á sunnudagsmorgun eða jafnvel á hátíðartónleikunum kl. 14 á sunnudag. Jón tekur nemendur í einkatíma, heldur fyrirlestur og svo verður smíðað eitthvað úr þeim efniviði sem til staðar verður. Þannig er Hólabarokkið, smiðja fyrir alla, lærða og leika, til að búa til eitthvað skemmtilegt, læra, kynnast og njóta lífsins. Söngnámskeiðið fer fram í stofu á annarri hæð í Hólaskóla.